Внимание!
Эта страница из архивного сайта. Информация может быть не актуальной.
«Тӑван шкул. Юратнӑ вӗрентекен». Ҫапла ят панӑ Вӗрентекен ҫулталӑкне халалланӑ черетлӗ «Чӗре кӗввисем» телетӗпеле. Унта пурнӑҫ ҫулне тупма, ун тӑрӑх ҫирӗппӗн тӑма пулӑшакан пирки - учитель ҫинчен - сӑмах пычӗ. Республикӑра ку енӗпе ырӑ тӗслӗх кӑтартакан шкул вун-вун, вӗрентекен те чылай. Кашни районти, хулари чи пултаруллӑ ӗҫченсене телетӗпелте, Трактор тӑвакансен культура керменӗнче, халӑх умне кӑларчӗҫ. Вӗсем хӑйсен паха опычӗпе паллаштарчӗҫ. Шкул ачисем, вӗсен ашшӗ-амӑшӗ, шкултан вӗренсе тухнисем ӑшӑ сӑмахсем илчӗҫ. Вӗсене чечексем, парнесем пачӗҫ. Чӑвашсен паллӑ юрӑҫисем Сергей Павлов, Августа Уляндина, Виталий Адюков, Валентина Кузнецова тата ыттисем вӗсем кӑмӑллакан юрӑсене шӑрантарчӗҫ.
Пултаруллӑ учительсемпе республика чӑннипех те мухтанма пултарать. Тӑвай вӑтам шкулӗн биологи учителӗ Альбина Петровна Михайлова 30 ҫул ӗнтӗ ачасене ӑс парать. Вӑл - РФ тата ЧР тава тивӗҫлӗ вӗрентекенӗ. Ӑна Раҫҫейри, республикӑри, районти чи лайӑх учитель ятне панӑ. Кӑҫал та вӑл ҫӗр-шыв шайӗнчи конкурсра ҫӗнтерсе преми ҫӗнсе илнӗ. Унӑн вӗренекенӗсем те тӗрлӗ олимпиадӑпа конкурсра мала тухаҫҫӗ.
Альбина Петровнӑн вӗренекенӗсенчен пысӑк пайӗ аслӑ вӗренӳ заведенийӗнче пӗлӳ пухать. Ҫакӑ уйрӑмах савӑнтарать: 5 ҫамрӑк унӑн профессине - биологи учителӗн ӗҫне - суйланӑ.
Вӑрнар районӗнчи Калинино вӑтам шкулӗ кӑҫал 165 ҫул тултарнӑ. Унтан вӗренсе тухнисен йышӗнче 6 генерал, пӗр контрадмирал, 40 ытла ӑслӑлӑх докторӗпе профессор, тава тивӗҫлӗ учительсем, артистсем, художниксем, врачсем, ял хуҫалӑх ӗҫченӗсем...
Шкул ырӑ ята ҫӳлте тьгтать. Ҫакӑ вара кунта - вӑй хуракан вӗрентекенсенчен нумай килет. Чунне парса ӗҫлекенсенчен пӗри - вырӑс чӗлхипе литература вӗрентекенӗ Юлия Ивановна Войнова. Кӑҫал вӑл районти чи лайӑх учитель ятне тивӗҫнӗ. Юлия Ивановнӑн ӗҫӗнче чи 1 пахи - ачасем тата пӗлӳ, вӗренекенсемпе тӑван амӑшӗ пекех пӗр чӗлхе тупма пӗлни.
Хӗрлӗ Чутай вӑтам шкулӗнчи Эдуард Васильевич Романов учителе ачасем хисеплеҫҫӗ, юратаҫҫӗ. Ҫакна та палӑртма кӑмӑллӑ: шкулти, районти интереслӗ пӗр мероприяти те вӑл хутшӑнмасӑр иртмест. Районти ҫамрӑк армеецсен «Зарница», «Орленок» вӑййисен программине те Э.В.Романов хатӗрлет. Ҫара кайма хатӗрленекен яшсемпе ӗҫлессине мала хурать вӑл. Ахальтен мар ӗнтӗ шкулти ҫамрӑксем ку енӗпе яланах ырӑ тӗслӗх кӑтартаҫҫӗ - республикӑри ҫара кайма хатӗрленекен яшсен спартакиадинче темиҫе ҫул малти вырӑнсене йышӑнаҫҫӗ.
Петр Костин.