2010.04.20 Çак ĕçе чунпа суйланă (Хыпар)

Тăваттăмĕш класра вĕреннĕ чухне Зина «Ÿссен эсĕ кам пулатăн?» темăпа çырнă сочиненире учитель профессине чунран юратнине палăртнă. Ĕмĕтне пурнăçлас тесе 1981 çулта вăтам шкул пĕтерсен Чăваш патшалăх университечĕн истори-филологи факультетне кĕнĕ. Диплом илсен Палтиелĕнчи вăтам шкулта ĕçлеме пуçланă. Унтанпа çирĕм тăватă çул çитет ĕнтĕ. Питĕ пултаруллă вĕрентекен вăл. Çавăн чухлĕ ĕç пурнăçлама вăй-халĕ ăçтан тухать-ши тесе те тĕлĕнетĕн.

Аслă Çĕнтерĕвĕн 65 çулне халалласа З.И.Свеклова нумай пулмасть районти чăваш чĕлхипе литературине вĕрентекенсен умĕнче «Ан пултăр вăрçă нихăçан» темăпа уçă урок ирттерчĕ. Хаяр вăрçă вăхăтĕнчи йывăр пурнăçа тÿссе ирттернĕ Антонина Андреевна Долговăна, Мария Афанасьевна Кузьминана, Николай Геннадьевич Долгова хăнана чĕннĕ. Маня аппапа Тоня инке ачалăх мĕн иккенне курмасăрах юлнă, вĕсем хăйсен чунĕ витĕр тухнă самантсем çинчен аса илсен нумайăшĕн куçĕ шывланчĕ. Иккĕшĕн те ашшĕсем вăрçăра хыпарсăр çухалнă. Маня аппан ашшĕ ăçта пуç хунине «хĕрлĕ йĕрлевçĕсем» шыраса тупнă.

2008 çулта шырав отрячĕ Смоленск çывăхĕнчи пĕр вăрманта хыпарсăр çухалнă Андрей Васильевич Федоров юлашкийĕсене тупнă. Часах унăн мăнукĕ, Николай Геннадьевич Долгов, Смоленска тухса кайнă. Ăна питĕ ăшшăн кĕтсе илнĕ. Уçă урокра Николай унта мĕн курнине каласа пачĕ. Тĕлĕнмелле! 67 çул иртсен унăн кукашшĕ ăçта пуç хуни паллă пулчĕ. З.И.Свеклова компьютерпа çав вырăнта ÿкернĕ видеофильм кăтартрĕ. Антонина Андреевнăн ашшĕне ыттисемпе пĕрле тăванла масарта чыслă пытарнине куртăмăр. Урока килнĕ учительсен те куççулĕ тухрĕ.

Зинаида Ивановна вăрçа сăнлакан ÿкерчĕксемпе ăста усă курчĕ. 8-мĕш кадет класĕнче вĕренекенсем те ахаль лармарĕç. Икĕ ушкăна пайланса «вăрçă», «мир» сăмахсене ăнлантарма сăмах нумай тупрĕç. Учитель ăсталăхне ачасем темăна пĕтĕмлетсе хăварма пĕлни те çирĕплетрĕ. Кадет класĕн командирĕ - Маня аппан мăнукĕ Артем Кузьмин, Тоня инкен мăнукĕ Кристина Долгова, Алена Стратилатова, Дмитрий Сергеев уйрăмах палăрчĕç.

З.Свеклова общество ĕçĕсене те чунпа пурнăçлать. Вăл - районта чăваш чĕлхипе литератури учителĕсен ассоциацийĕн ертÿçи. Анлă тавра курăмлă учителе районти педагогсем хисеплеççĕ, юратаççĕ. Иртнĕ вĕрентÿ çулĕнчи ĕç кăтартăвĕсем тăрăх З.И.Свеклова методика пĕрлешĕвĕсен ертÿçисен хушшинче 3-мĕш вырăн йышăнчĕ. Районти вĕрентÿ управленийĕн методисчĕ Г.Н.Иванова пулăшса пынипе вăл Елчĕк, Шăмăршă, Патăрьел районĕсенчи учительсем валли Васанти вăтам шкулта «Çăкăртан аслă ан пул» темăпа опытпа паллаштаракан уроксен фестивальне ирттерчĕ. Кунта 7 вĕрентекен урок пачĕ. Темăна пурте çĕнĕ технологипе ирттерчĕç. Çакăн пек фестивальсем пĕр-пĕрин хушшинчи туслăха çирĕплетеççĕ, малалла тата лайăхрах ĕçлеме хистеççĕ.

Пур енлĕн аталаннă педагог сăвă-тĕрленчĕксем те, очерк-калав та çырать. 2003 çулта унăн «Чĕре сасси» ятпа пĕрремĕш кĕнеки кун çути курчĕ. Республикăри «Халăх шкулĕ» журнал Çеçпĕл Мишши çуралнăранпа 110 çул çитнине халалласа сăвă çыракансен конкурсне йĕркелерĕ. 5 çĕнтерÿçĕ хушшинче Зинаида Ивановна ячĕ те пур.

Унăн вĕренекенĕсем тĕрлĕ олимпиадăна хастар хутшăнаççĕ. 2008 çулта Венера Габитова чăваш чĕлхипе районта - пĕрремĕш, республикăра виççĕмĕш вырăн йышăнчĕ. Кăçал та мала тухрĕ, Шупашкарта 3-мĕш вырăн çĕнсе илчĕ, Чăваш Республикин Президенчĕн стипендиачĕ пулса тăчĕ. Зинаида Ивановнăна регионсен хушшинчи олимпиадăна хатĕрлес енĕпе пысăк çитĕнÿсем тунăшăн И.Я.Яковлев ячĕллĕ Чăваш патшалăх педагогика университечĕн чăваш чĕлхипе литератури факультечĕн деканачĕ хисеп хучĕпе наградăланă. Вăл районти «Чи лайăх класс ертÿçи» конкурсра аслă классенчи ертÿçĕсен хушшинче çĕнтерÿçĕ пулчĕ, халĕ республика шайĕнчи ăмăртура тупăшма хатĕрленет.