Внимание!
Эта страница из архивного сайта. Информация может быть не актуальной.
Чи пултаруллӑ вӗрентекенсем тивӗҫекен 100 пинлӗх гранта 2009 ҫулта Елчӗк районӗнчи Ҫӗнӗ Пӑва шкулӗнчи биологи, географи, информатика учи-телӗ Олимпиада Васильевна Викентьева илнӗ. Олимпиада Васильевна 1973 ҫулта Аслӑ Шӑхаль ялӗнче ҫуралнӑ. 1990 ҫулта И.Я.Яковлев ячӗллӗ Чӑваш патшалӑх педагогика университетне физикӑпа математика факультечӗн математикӑпа информатика уйрӑмне вӗренме кӗнӗ. Диплом илсен тӑван шкулӗнче информатика предметне вӗрентме тытӑннӑ, директорӑн воспи-тани енӗпе ӗҫлекен ҫумӗнче тӑрӑшнӑ. 2005 ҫулта куҫӑмсӑр майпа Мускаври Шолохов ячӗллӗ патшалӑх педуниверситетне вӗренме кӗнӗ. Ҫав ҫулах ачасене биологи, географи предмечӗ-сене вӗрентме пуҫланӑ.
Кашни вӗренекенӗн /япӑх вӗренет-и е аван паллӑсемпе ӗлкӗрсе пырать-и/ юратнӑ предмечӗ пурах. Вӗрентекен хӑйӗн предметне ача патне ансатрах мелпе илсе ҫитерме, уроксене хаваспа килсе тулли кӑмӑлпа ҫӗнни, кӑсӑкли нумай каласа пама пӗлнин витӗмӗпе пулать ку. О.В.Викентьевӑпа паллаш-сан ҫак пахалӑхсене тӳрех асӑрхатӑн. Шкул ачисен, вӗрентекенсен хушшинче ҫулсеренех иртекен республика, район конкурсӗсем нумайлансах пыраҫҫӗ. "Чи лайӑх класс ертӳҫи" конкурсах илер. Ҫӗнӗ Пӑва шкулӗнчи биологи учителӗ ҫак конкурса тӑтӑшах хутшӑнать. 2007 ҫулта районта -виҫҫӗмӗш, 2008 ҫулта иккӗмӗш вырӑна тухнӑ. Ӑна 2008 ҫултах республикӑри конкурсра пултарулӑхшӑн сертификатпа чысланӑ. Районти ӑслӑлӑх-практика пӗр конференцийӗ те Ҫӗнӗ Пӑвасем хутшӑнмасӑр иртмест. Ачасем ҫут ҫанталӑка сӑнама кӑмӑллани сисӗнет: форумра биологи сещине суйлакан чылай. "2008 ҫулта биологипе республикӑра иртекен конкурсра виҫҫӗмӗш вырӑна тивӗҫрӗмӗр. Чечексене тӗпчесе "Ял хуҫалӑх сӑнавҫисем" конкурсра виҫҫӗмӗшсем пултӑмӑр", - ӗҫ-хӗлӗпе паллаштарать сумлӑ грант хуҫисенчен пӗри. Чи пултаруллисене те асӑнмасӑр хӑвармарӗ Олимпиада Васильевна. Кӑҫал 8-мӗш класра вӗренекен Д.Миронова "Гладиолус улмисене тӗрлӗ вы-рӑнта упраса сӑнасси", "Пирӗн тӑрӑхра хӗл каҫакан кайӑксем" тата ытти ӗҫпе республикӑра та палӑрнӑ. 9-мӗш класри Сергей Викентьев 6-мӗш класранпа тӗрлӗ конференцие хутшӑнать. Унӑн Раҫҫей утравӗсене халалланӑ ӗҫӗ республикӑра чи лайӑххи пулнӑ.
"Ҫамрӑк натуралистсем" кружока ачасем хапӑлласа ҫӳренипе кӑмӑллӑ Олимпиада Васильевна. Хӑйӗн ҫамрӑк тусӗсемие вӑрмана час-часах ҫӳрет. Ачасемпе вӗрентекен хушшинчи ҫирӗп ҫыхӑну, туслӑх, пӗр-пӗрне ӑнланни куҫ кӗрет. "Вӗлле хурчӗ те пӗччен пыл пухаймасть, - теҫҫӗ халӑхра. - Эпир тӑвакан ҫитӗнӳ тупсӑмӗ - пӗрлӗхре вӑй пулнинче", - пытармасть шухӑшне вӗрентекен. О.Викентьева та, шкул ачисем те яланах ҫӗннине шыраҫҫӗ. Раҫҫейри конкурс-викторинӑсене хутшӑнаҫҫӗ. Информатика вӑрттӑнлӑхӗсене аван пӗлекен учитель - шкул сайтне чи малтан йӗркелекенсенчен пӗри. Вӑл пулӑшнипех вӗрентекенсем "Русский медвежонок", "Инфознайка", "Кит" ӑмӑртусенче пултарулӑхне тӗрӗслеҫҫӗ.
- Географи, биологи, информатика урокне ирттерме шкулта компьютер-сем, географи карттисем пур. Халӗ тата цифрӑллӑ микроскоп ҫинчен ӗмӗтленетпӗр, - хӑйӗн ӗҫне чунран юратнӑран лайӑххи патнех ӑнтӑлнине палӑртрӗҫ маттур учителӗн сӑмахӗсем.
Олимпиада Васильевна пек камӑн пулас килмӗ? Чылай ача хӑйӗн юратнӑ вӗрентекенне тӗслӗх вырӑнне хурса учитель пулас ӗмӗтпе пурӑнать.
Алиса ИВАНОВА