Виктор Алексеев, ЧР вӗрентӳпе ҫамрӑксен политикин министрӗн ҫумӗ:
- Сериал тӗрлӗ шухӑш ҫуратрӗ. Чи малтанах сюжета таҫтан "туртса кӑларнӑн" туйӑнчӗ. Проект авторӗ шкула хӑйӗя куҫӗпе кӑтартать. Темле пулсан та пӗлӳ тӗнчинче ҫутӑ сӑнарсем пурах. Вӗренме ӑнтӑлакан яш-кӗрӗмпе хӗр-упраҫ чылай. Вӗрентекен ҫулталӑкӗнче педагогӑн ирсӗр ҫак ӗҫшӗн тӳрре тухмалла мар.
Алексей Львов, Шупашкар хула администрацийӗн ҫамрӑксен аталанӑвӗн пай пуҫлӑхӗ:
- Кинофильма тӗрлӗ енлӗн хаклама пулать. Пӗрремӗшӗнчен, вӑл ашшӗ-амӑшне ачасемпе шкулта мӗн сиксе тухассине систерет, иккӗмӗшӗнчен, ҫамрӑксем сериалти сӑнарсене евӗрлесрен шикленмелле. Тӗслӗхрен, пӗр телеканалпа кӑтартакан "Мафия" кӑларӑма илер. Студентсем ҫӗрле кӗнеке вуласа, "конспект ҫырса лармаҫҫӗ. Пӳлӗме нумаййӑн пухӑнса ҫав вӑййа "путаҫҫӗ". 8-9-мӗш классенче вӗренекенсемпе пушшех те асӑрхануллӑ пулмалла. Вӗсем ят-сумлӑ ҫынна шыраҫҫӗ. Унӑн тыткаларӑшӗпе "хӗҫ-пӑшалланаҫҫӗ". Шкулта вӑтам вӗренекен ача хӑйне хисеплеттерес тесе вӗрентекенрен кулма пуҫласан? Ыттисенчен уйрӑлма урӑх мел те пур. Сериалта патриотлӑха кӑтартсан ӑна пӑхма та хаваслӑрахчӗ. Валерия Гай Германика паянхи шкулӑн ҫивӗч ыйтӑвне курать, анчах 15 ҫулти ҫамрӑкӑн ҫак авӑртан мӗнле тухмаллине кӑтартмасть. "Все умрут, а я останусь" кинофильмри Катя ашшӗ-амӑшӗпе калаҫмасть. Шкул ачисем унран кулаҫҫӗ, шелсӗр хӗнеҫҫӗ. Чунӗпе парӑннӑ каччи ӑна пулӑшма шухӑшламасть те. Хӗр пӗччен тӑрса юлать. Унӑн пурнӑҫӗ мӗнпе вӗҫленесси паллӑ. Режиссер шухӑшне йӗрлес тӗк Катя хӑйӗн ҫине алӑ хурать е аслисене тӗп тӑвать. Ҫул ҫитменнисен шалти хирӗҫ тӑрӑвне урӑхла кӑтартма та пулать-ҫке. Эрех-сӑрапа туслашнине ӳкерес вырӑнне баскетболла вылянине кӑтартсанах урӑх пӗтӗмлетӳ тӑваттӑм.
Надежда Леонтьева, Шупашкарти 7-мӗш шкул директорӗн вӗрентӳ пайӗн ҫумӗ:
- Ҫак канал сӗннӗ сериала 20 минут пӑхни те кӑмӑла пӑсма ҫителӗклӗ пулчӗ. Кинофильм вӗрентекене кӳрентерет, унӑн сумне варалать. Тен, Мускавра ҫавӑн пек шкулсем пур пулӗ, анчах Чӑваш Республикин педагогӗсем, вӗренекенӗсем унти пек тӗслӗхсемпе тӗл пулман. Ҫӗнӗ проект учителе татах "питӗнчен ҫупать".
Тамара Варякина, Шупашкарти Мускав районӗнчи социаллӑ реабилитаци центрӗн психологӗ:
- Килӗшӳсӗр проектӑн 2 кӑларӑмне тишкернипе ҫырлахрӑм. Тӑнлӑ ачасем ӑна пӑхмаҫҫӗ. Пӗр ҫын шкулти лару-тӑрӑва айӑн-ҫийӗн ҫавӑрттараймасть. Вӗрентекен чунне илекенскерсен воспитани пачах ҫук. Ачасем педагогсене хисеплемеҫҫӗ- Тӗслӗхлӗ класра кашни хӑйӗншӗн тӑрӑшать. Ҫӗнӗ пӗлӳ патне туртӑнакансем пачах ҫук. "Укҫапа
пӗтӗмпех туянма пулать", - шухӑш мала тухать. Ачасем вӗренесшӗн ҫунманни тӗрӗсха. Юлашки ҫулсенче вӗсен чурӑслӑхӗ ҫиеле тухрӗ. Шупашкарта сериалти пек ахӑр самана пуҫлансан ӑҫта ҫитӗпӗр? Тӗслӗхрен, "Кадетство" картинӑра пӗр-пӗрне пулӑшни, яваплӑх пурччӗ. "Школа" мӗн кӑтартать? Ачасем ӑна пӑхманни савӑнтарать. Вӑл аслисене калаҫтарни общество ҫакна хирӗҫ пулнине палӑртать.
Ирина Шмелева, Вӑрнарти В.Е.Егоров ячӗллӗ 1-мӗш вӑтам шкул вӗренекенӗ:
- Ытла та тӳрккес кинофильм. Пӗрле вӗренекен тусӑм хула шкулӗсенче сериалти хӑш-пӗр тӗслӗх пур тет. Ҫапах ырми-канми тӑрӑшакан учительсене, каҫарӑр та, тӑмсайсем пек кӑтартни ытла кӑнттам. Пурнӑҫра хӑйӗн вырӑнне шыракан ачасене сӑнланӑ тӑк проекта пӑхаттӑм, анчах манӑн паянхи кунпа савӑнса юлас текенсем ҫинчен ӳкернӗскере курас килмест.
Ольга НЕСТЕРОВА.