2010.01.15 Конкурс йĕркеленĕ (Çамрăксен хаçачĕ)

Вӗрентекен кашниншӗнех пысӑк пӗлтерӗшлӗ. Вӑл ачасене ырра вӗрентет, пӗлӳ тӗнчипе паллаштарать. Ахальтен мар ӗнтӗ вӗсен сумлӑ ӗҫне палӑртса РФ Президенчӗ Дмитрий Медведев 2010 ҫула Вӗрентекен ҫулталӑкӗ тесе палӑртнӑ.

Учительсен професси ӑсталӑхне ӳстерес тӗлӗшпе республикӑри район-хулара тӗрлӗ мероприяти йӗркеленет. Етӗрне районӗнче "Ман юратнӑ вӗрентекен" фотоконкурс старт илнӗ. Пӗр уйӑхра конкурса хутшӑнас текенсен учитель пурнӑҫӗпе ҫыхӑннӑ интереслӗ самантсем тупса сӑнламалла. Сӑн ӳкерчӗксен конкурсӗн пӗтӗмлетӗвӗпе килӗшӳллӗн чи лайӑх ӗҫсенчен курав йӗркелӗҫ.

ЧР Вӗрентӳ министерстви 9-11-мӗш классенче вӗренекенсен хушшинче "Пуласлӑх учителӗ" эссесен конкурсне йӗркеленӗ. Ӗҫсене uch-bud@mail.ru. электрон адреспа ярса пама май пур, тӗрленчӗксене кӑрлачӑн 23-мӗшӗччен йышӑнаҫҫӗ.

Любовь ЗУБОВА