И.Н.Ульянов ячĕллĕ Чăваш патшалăх университечĕн президенчĕ, Раççей вĕрентÿ академийĕн академикĕ Л.П.Кураков Патăрьел район пуçлăхĕпе Н.И.Глуховпа пĕрле Патăрьел районĕнче Раççей Федерацийĕнчи тата Чăваш Республикинчи Вĕрентекен çулталăкне уçнă ятпа халалланă мероприятисене хутшăннă. Патăрьелĕнчи культурăпа кану центрне педагогика ĕçĕн ветеранĕсем, пĕтĕмĕшле пĕлÿ паракан шкулсен делегацийĕсем, директорĕсем,
садиксен заведующийĕсем пухăннă.
Патăрьел районĕнче паян патшалăхăн вĕрентÿ учрежденийĕ иккĕ: Чăваш патшалăх университечĕн филиалĕ, 7-мĕш професси училищи. Муниципалитетăн 52 вĕрентÿ учрежденийĕ ĕçлет. Çав шутра - пĕтĕмĕшле пĕлÿ паракан 34 шкул, 15 ача сачĕ, 3 хушма вĕрентÿ учрежденийĕ. Шкулсенче 5386 ача вĕренет. Кашнинчех наградăсене тивĕçлĕ учительсемпе вĕренекенсем пур. Чи лайăххисене район пуçлăхĕ Н.И.Глухов Тав çырăвĕсем, Чăваш Республикин Президенчĕн стипендине илме тивĕçлĕ пулнине çирĕплетекен свидетельствăсем пачĕ.
Лев Пантелеймонович Кураков учителĕн ÿссе пыракан ăрăва вĕрентсе воспитани парас ĕçĕнчи тÿпине пысăка хурса хакларĕ. Унăн витĕмĕсĕр президент та, академик та, бизнесмен та, тивĕçлĕ ытти çын та пулаймăн, экономикăна çĕнетсе улăштарасси те пурнăçа кĕреймĕ. Çавăнпа пирĕн педагог ĕçне хисеплеме вĕрентмелле, çак ĕçе педагогика ветеранĕсене хастар хутшăнтармалла, тесе палăртрĕ. Академик сăмахĕнче Раççей Федерацийĕн Президенчĕ Д.А.Медведев Федераци Канашне янă Çырăва тата Чăваш Республикин Президенчĕ Н.В.Федоров Патшалăх Канашне янă “Чăваш Ен: пуласлăхри тата пуласлăхшăн” Çырăва пурнăçа кĕртес ыйту тĕп вырăн йышăнчĕ. Л.П.Кураков çавăн пекех Чăваш патшалăх университетне Раççей Федерацийĕн Правительствин Председателĕ В.В.Путин пырса курнă чухнехи ырă самантсене аса илчĕ.
Педагогсен форумĕ учительсемпе вĕренекенсен, студентсен чаплă концерчĕпе вĕçленчĕ. ЧПУ Патăрьелĕнчи филиалĕн преподавателĕсемпе сотрудникĕсен туслă коллективĕ Станиславпа Вероника Толстовсен “Университет” юррине хавхаланса шăрантарчĕ.
Тепĕр кунне, шăмат кун, Турханри пĕтĕмĕшле пĕлÿ паракан шкулта выпускниксен йăлана кĕнĕ тĕл пулăвĕ иртрĕ. Унта çавăн пекех район пуçлăхне Н.И.Глухова, Чăваш патшалăх университечĕн президентне Л.П.Кураков академика, Патăрьелĕнчи филиал директорне Л.В.Лялина профессора чĕннĕ. Палăртма кăмăллă: Чăваш патшалăх университетĕнче паян çак шкула пĕтернĕ 53 çамрăк вĕренет. Хăнасем Раççей паллă художникĕн Алексей Кокелĕн музей-çуртне, спонсор пулăшăвĕн шучĕпе тунă хоккей площадкине çитсе курнă, шкулта ачасем, учительсем, выпускниксем умĕнче тухса калаçнă.