2007.02.26 Президент елкинче

 

 

Шкулти “Çамрăк çыравçă” кружок хыççăн киле кайма хатĕрленеттĕм, унччен те пулмарĕ ман пата пирĕн класс ертÿçи Е. Александрова пычĕ те савăнăçлă хыпар пĕлтерчĕ: мана хамăр шкултан Чăваш Республикин Президенчĕн Çĕнĕ çул елкине яма суйласа илнĕ иккен. Хăвăртрах киле çитсе çак хыпара аннене пĕлтертĕм. Юратнă çыннăм уншăн çав тери хĕпĕртерĕ. Елкăна каймалли кĕпене аттепе пĕрле çĕлерĕмĕр. Вăл çĕвĕç ĕçĕнче хăйне май ăста.

Савăнăçлă кун çитрĕ. Шупашкара пире автобуспа илсе кайрĕç. Тĕп хулана çитсен столовăя кĕтĕмĕр. Апачĕ тÿлевсĕр, республика ертÿçи ăна хăй шутĕнчен саплаштарать иккен. Чăваш патшалăх оперăпа балет театрĕнче йĕркелекен елкăна çитрĕмĕр, Çĕнĕ çул тумĕсене тăхăнтăмăр та зала кайрăмăр. Епле илемлĕ кунта. Пире “Куча мала” ятлă журнал парнелерĕç. Асăннă кăларăмăн ертÿçисем юмах кăтартрĕç. Вăл “Çĕнĕ çула шыратпăр” ятлă. Питĕ интересленсе пăхрăмăр ăна. Юрă-ташăллă юмах пурин кăмăлне те кайрĕ. Ун хыççăн тепĕр зала кĕтĕмĕр. Унта тĕрлĕ тĕслĕ çутăпа ялкăшса симĕс чăрăш ларать. Эпир ун тавра тăрса юрларăмăр, ташларăмăр, савăнтăмăр.

Часах киле таврăнма та вăхăт çывхарчĕ. Автобус çине ларнă чух пире кашнинех ЧР Президенчĕн Н. Федоровăн Çĕнĕ çул кучченеçне тата вăл алă пуснă открытка пачĕç. Киле çитсен эпĕ Шупашкарта елкăра пулни çинчен атте-аннене тĕплĕн каласа патăм. Шкулти юлташсем те çак çул çÿрев çинчен çăвар карсах итлерĕç.

Çапла асра юлчĕ ЧР Президенчĕн елки.

 («Сельская жизнь (Ял пурнăçĕ)», Красноармейское)