Внимание!
Эта страница из архивного сайта. Информация может быть не актуальной.
Февраль уйăхĕн пуçламăшĕнче Канашри педагогика колледжĕ пулас абитуриентсене, вĕсен ашшĕ-амăшĕсемпе вĕрентекенĕсене, вĕрентÿ заведенийĕпе туллинрех паллашас текенсене хапăл туса кĕтсе илчĕ. Музыка уйрăмĕнче вĕренекенсем хăнасене концертпа саламларĕç.
Г.Косолапов директор студентсем лайăх вĕренччĕр тесе училищĕре туса панă условисемпе паллаштарчĕ. Кунта пĕлÿ илнисем колледж хыççăн кĕскетнĕ формăпа И.Я.Яковлев ячĕллĕ Чăваш патшалăх педагогика университетĕнче, Арзамасри пединститутра, Ульяновскри политехника институтĕнче, Мускаври гуманитари институтĕнче аслă пĕлÿ илме пултараççĕ.
Йышăну комиссийĕн председателĕ Т.Зиновьева пухăннисене «Преподавание в начальных классах», «Физическая культура», «Музыкальное образование», «Программное обеспечение вычислительной техники и автоматизированных систем», «Дизайн» специальноçсемпе вĕренме кĕмелли йĕркесемпе паллаштарчĕ.
Пулас абитуриентсем колледж историйĕпе те кăсăкланчĕç. Унпа çамрăксене педагогика наукисен кандидачĕ О.Краснова паллаштарчĕ. Вăл колледжри музейра экскурси ирттерчĕ. Шкул ачисемпе учительсем педколледжпа, унти вĕренÿ пÿлĕмĕсемпе, компьютер класĕсемпе, тренажер залĕпе хавхаланса паллашрĕç.
ÇĂВАРНИНЕ ĂСАТСА ЯЧĔÇ
Шаккăл ял тăрăхĕнче Çăварнине савăнăçă лару-тăрура ăсатрĕç. Культура çурчĕ умне капăр тумланнă халăх пуçтарăнчĕ. Виçĕ ялтан илемлетсе пĕтернĕ лашасемпе килчĕç. Таврара чылайччен шăнкăравсен кĕмĕл сасси, хавслă юрă-кĕвĕ янăраса тăчĕ. Халăх юрларĕ, ташларĕ, такмаксем каларĕ, савăнăçлă вăйăсем вылярĕ, лашапа катаччи чупрĕ. Кĕскен каласан, никама та кичем пулмарĕ.
КАНАШСЕМ ÇĔНТЕРНĔ
Шăхасанти физкультурăпа спорт комплексĕнче Чăваш Республикин Президенчĕн Кубокĕшĕн кĕрешсе шкул ачисен спартакиади шучĕпе волейболистсен зонăри ăмăртăвĕ пулса иртнĕ.
Пĕрремĕш вырăна канашсем çĕнсе илнĕ, иккĕмĕшпе виççĕмĕшне – çĕрпÿсемпе патăрьелсем.
ĂНА ХАЛĂХ МАНМАСТЬ
Нумаях пулмасть чăваш халăхĕн паттăр ывăлĕ, пултаруллă çар пуçĕ В.И.Чапаев çуралнăранпа 120 çул çитрĕ. Çак ятпа республикăра, районта чылай мероприяти пулса иртрĕ. Вĕсенчен пĕрне, асăну каçне, Хучел ял библиотека заведующийĕ Е.Демьянова тата О.Иванова методист ирттерчĕç.
Вĕсем «Чăваш халăхĕн легендарлă паттăрĕ» ятпа кĕнекесен выставкине йĕркелерĕç. Библиотекăна çÿрекенсене В.И.Чапаев кун-çулĕпе паллаштарчĕç, çапăçусенчи паттăрлăхĕ, вилĕмĕ çинчен каласа пачĕç.
УКÇАСĂР ХĂВАРНĂ
Эрехне хытах ĕçсе лартнă çав кун Матьшÿ ялĕнче пурăнакан арçын. Çулĕ те сахал мар ĕнтĕ хăйĕн – утмăлалла тапăлтатать. Килне кĕреймен вăл, килĕ умĕнче ларакан машинин салонĕнчех хуп турттарма тытăннă. Хаяр шĕвекĕ кăштах сĕвĕрĕлсен тăна кĕнĕ хайхискер. Анчах та пуçĕ тата хытăрах ыратма пуçланă: куртка кĕсйине чикнĕ укçи таçта кайса кĕнĕ. Укçи вара сахалах мар – 25 пин тенкĕ. Вăл ÿсĕр выртнă хушăра унăн кĕсйисене такамăн «кукăр» алли питĕ тĕплĕ тĕрĕсленĕ. Хăйне мĕн кирлине тупнă та шыва пенĕ чул катăкĕ пекех çухалнă.
ÇАМКИНЕ АМАНТНĂ
Карăклă ялĕ çывăхĕнче Канаш çынни тытса пыракан «ВАЗ-2104-3» автомобиль вылянса кайнипе хирĕçле юхăма сиксе тухнă. Çакна пула «ВАЗ-21093» машинăпа çапăннă. Автоинкекре 33 çулти хĕрарăм çамкине амантнă. Ăна хула больницинче медпулăшу панă хыççăн килне янă.
В. АЧЧА
(«Канаш», Канаш)