2007.02.19 Анлă канашлăвăн теми – “1997-2007 çулсем – вĕрентÿ пахалăхĕн çĕнĕ çул-йĕрĕ”.

 

Район администрацийĕн вĕрентÿ, çамрăксен политики тата физкультурăпа спорт пайĕн пуçлăхĕ Л.И. Мочалов ЧР Президенчĕн “Çĕнĕ шкул” программин аталанăвĕпе, пурнăçланăвĕпе паллаштарчĕ. Пысăк пĕлтерĕшлĕ, общество пурнăçне улăштарас ĕçре тĕп вырăн йышăнакан “Çĕнĕ шкул” программа 10 çул тултарчĕ. Çак тапхăрта вĕрентÿ сферинче чылай çитĕнÿсем, çĕнĕлĕхсем пулса иртрĕç.

Çулталăк пуçланнăранпа пĕр уйăх хыçа юлчĕ, çак вăхăтра пĕлÿ паракан шкулсем тата шкул çулне çитмен учрежденисем общественноç умĕнче хăйсен уçă доклачĕсене турĕç. Çак ĕç вара тĕрлĕ шкулта тĕрлĕрен пулса иртрĕ. Хăш шкулсенче Уçă алăксен кунĕ, хăшĕсенче Обществăлла экспертиза кунĕ пулчĕ.

Иртнĕ çул “Вĕрентÿ” наци проекчĕпе килĕшÿллĕн инноваци ĕçĕ-хĕлне тата пултарулăх пуçарăвне аталантарас ĕçре Муркаш лицейĕпе Калайкасси шкулĕ çĕнтерÿçĕсем пулса тăчĕç. Вĕсем районти вĕрентÿ учрежденийĕсем валли “Шкул-шкула” ячĕллĕ мероприяти ирттерчĕç. Вĕрентÿ ĕçĕнче пултарулăхпа палăрнă 3 вĕрентекен РФ Президенчĕн парнине çĕнсе илчĕç. Вĕсем: Турай шкулĕнчи А.Ю. Герасимова, Москакассинчи С.Ф. Желтова, Калайкасси шкулĕнчи В.Т. Моисеев. Муркаш шкулĕн вĕрентекенĕ В.В. Смирнова ЧР Президенчĕн Грантне тивĕçрĕ. Районти чи лайăх учительсем “Учитель-учителе” мероприятие çамрăк вĕрентекенсем валли ирттерчĕç.

Р. ИЛЛАРИОНОВА

 («Знамя победы (Çĕнтерÿ ялавĕ)», Моргауши)