2007.02.17 КАНАШСЕМ ТЕ ХУТШĂНЧĔÇ

Конференци хыççăн район администрацийĕн пуçлăхĕ В.Софронов пĕтĕмлетÿ канашлăвĕ ирттернĕ. Вĕрентÿ управленийĕн пуçлăхĕ Ю.Апексеев «Çĕнĕ шкул» программа районта мĕнле пурнăçланса пыни çинчен каласа панă, вĕренекенсен çитĕнĕвĕсем çинче чарăнса тăнă, малашлăх планпа паллаштарнă.

 

ДЕПУТАТ ПАРНИСЕМШĔН

Нефтеюганск хулинче пиллĕкмĕш хут ирĕклĕ майпа кĕрешсе Ханты-Манси автономиллĕ округĕн Думин депутачĕ, пирĕн ентешĕн, Елчĕк районĕнче çуралса ÿснĕ Владимир Семеновăн парнине çĕнсе илессишĕн ăмăртрĕç. Унта 7 çĕршывран 30 команда хутшăнчĕ. Чăваш спортсменĕсен ушкăнне Чăваш Республикин Федерацийĕн Патшалăх Думин депутачĕ, Раççей ирĕклĕ майпа кĕрешекенсен федерацийĕн председателĕ Павел Семенов ертсе пычĕ.

Чăваш Республикин чысне хÿтĕленĕ 8 спортсменран виççĕшĕ пирĕн районтан: вĕсем – Александр Сергеев, Вячеслав Трофимов, Александр Филиппов. Командăсем хушшинче Чăваш Ен кĕрешÿçисем виççĕмĕш вырăн йышăнса бронза медаль çĕнсе илчĕç. Вĕсене Павел Семенов ăшшăн саламларĕ, çитĕнÿсем сунчĕ.

 

СТУДЕНТСЕМПЕ ТĔЛ ПУЛЧĔ

Санкт-Петербургри Петров колледжĕн Канашри филиалĕнче виççĕмĕш курсра «Патшалăх тата муниципалитет управленийĕ» специальноçа вĕренекен студентсем «çавра сĕтел» хушшинче район администрацийĕн ĕçĕсене йĕкелесе пыракан пай пуçлăхĕпе Э.Кузьминпа тата çак вĕренÿ заведенийĕн преподавателĕпе Т.Прохоровăпа тĕл пулчĕç. Вĕсем "Вырăнти хăй тытăмлăх органĕсен ку чухнехи ĕçĕсен уйрăмлăхĕсем» темăна сÿтсе яврĕç. Студентсене Эдуард Егорович муниципалитет служащийĕсен тивĕçĕсем çинчен каласа пани уйрăмах интереслĕ пулчĕ. Ыйтусем те нумай пачĕç ăна. Вĕсенчен пĕри те хуравсăр юлмарĕ.

 

ВАТĂСЕН ÇУРТНЕ – 10 ÇУЛ

Пайкилтри ватăсен çуртне уçнăранпа 10 çул çитрĕ. Çак ятпа йĕркеленĕ уява хаклă хăнасем те хутшăнчĕç. Вĕсем хушшинче – Чăваш Республикин сывлăх сыхлавĕ тата социаллă аталану министрĕн çумĕ Г.Степанов, РФ Патшалăх Думин депутачĕн П.Семеновăн пулăшуçи А.Чернов, район администрацийĕн пуçлăхĕн çумĕ Э.Александров, «АККОНД» акционерсен уçă пĕрлĕхĕн генеральнăй директорĕн çумĕ М.Иванов тата ыттисем.

Георгий Васильевич министерство ячĕпе илемлĕ литература комплекчĕ, Анатолий Михайлович Патшалăх Думин депутачĕн, «Единая Россия» фракци членĕн парнине, тĕрлĕ тĕспе кăтартакан телевизор, пачĕç. Павел Владимирович хăйĕн саламĕнче çакна палăртса хăварнă: «Тăван çĕршыв пуянлăхĕшĕн, мăнаçлăхĕшĕн вăй-халне шеллемен çынсене манма пирĕн ирĕк çук. Çĕршыв ялан тĕреклĕ пултăр, эсир тунине упрас тата ÿстерсех пырас тесе хамăртан мĕн килнине пĕтĕмпех тăвăпăр, хаклă ветерансем».

Паянхи кун тĕлне Пайкилтри ватăсен çуртĕнче 18 çын пурăнать. Вĕсем – инвалидсем, тыл ĕçченĕсем, ĕç ветеранĕсем. Лайăх пурăнма, тивĕçлĕ медицина пулăшăвĕ илме кирлĕ условисем туса панă. Коллектива В.Григорьева ертсе пырать.

 

ÇУЛТАЛĂКРИ ĔÇСЕНЕ ПĔТĔМЛЕТНĔ

«Агат» тулли мар яваплă пĕрлĕхре ĕçлекенсен пухăвĕ иртнĕ. Пĕрлĕх пуçлăхĕ Н.Ильин отчетлă доклад туса панă. Хуçалăх сĕт, аш-какай хатĕрлес, кирпĕч хĕртес енĕпе ĕçлет. 11 трактор, лизингпа 3 трактор, 3 комбайн тата 3 автомашина илнĕ. Пĕрер опрыскиватель тата культиватор туяннă.

Кĕрхи çĕртмене 100 проценчĕпех пурнăçланă. 1696 центнер сĕт сунă, ăна 818 пин тенкĕлĕх сутнă. Выльăх-чĕрлĕх ĕрчетессинче 72 пин тенкĕ услам илнĕ, кирпĕч сутса – 834 пин тенкĕ. Пĕтĕм тупăшăн сумми – 4902500 тенкĕ. Рабочисен вăтам ĕç укçи – 2780 тенкĕ.

 

УРОК БИБЛИОТЕКĂРА ИРТРĔ

Çĕнĕ Шелттем библиотекинче «Тăван тăрăх сукмакĕсемпе» ятпа тавра пĕлÿ урокĕ иртнĕ. Вулав залĕн стенисене плакатсемпе, цитатăсемпе илемлетнĕ, район тата ял историйĕпе паллаштаракан курав йĕркеленĕ. Унта – кĕнекесем, альбомсем.

«Çамрăк вулавçăсем» клуб членĕсем Çеçпĕл Мишши, Петĕр Хусанкай, В.Давыдов-Анатри, вырăнти Петĕр Çăлкуç, А.Зайцев, А.Шамбулина поэтсен сăввисене вуласа панă. Урок вĕçĕнче «Жемчужина Поволжья», «Çĕнĕ Шелттем ялĕ», «Пĕр тăван Захаровсен урамĕн уявĕнче» видеофильмсем кăтартнă.

 («Канашский край (Канаш ен)», Канаш)