2007.02.16 Чăваш педуниверситечĕн

Юлашки çулсенче студентсем хĕллехи каникулта каннă вăхăтра педуниверситет деканĕсемпе преподавателĕсем шкулсенче пулса выпускниксемпе курса калаçаççĕ. Хальхинче В.Тимофеев ертсе пыракан ушкăна Елчĕксем тулли кăмăлпа кĕтсе илчĕç.

Тĕл пулу интереслĕ те курăмлă иртрĕ. Факультет деканĕсемпе преподавателĕсем пулас абитуриентсене тĕрлĕ хыпарсем пĕлтерчĕç: паян мĕнле професси ытларах кирлĕ, вĕренме кĕмелли условисем, педуниверситет пĕтерекенсене мĕнле малашлăх кĕтет... Выпускниксене аслă вĕренÿ заведенийĕнчи мĕн пур ĕç кăсăклантарчĕ. Шкул ачисемпе ашшĕ-амăшĕ педуниверситет ĕçĕ-хĕлĕпе тĕплĕн паллашасшăн. Çак аслă вĕренÿ заведенине кашни çулах Елчĕксем йышлăн вĕренме кĕреççĕ. Кăçал та педагог пулас шухăшлисем нумайăн. Хăнасем çамрăксен ыйтăвĕсем çине тулли хуравсем пачĕç.

Тĕл пулу Чăваш патшалăх педагогика университечĕ çумĕнчи З.Козлова ертсе пыракан “Юрай” ансамбль концерчĕпе вĕçленчĕ.

 («Яльчикский край (Елчĕк ен)», Яльчики)