2007.02.16 ПУЛТАРУЛЛĂ ВĔРЕНТЕКЕН

Елена Петровна – пултаруллă вĕрентекен. Ахальтен мар кашни çулах вĕренекенсем акăлчан чĕлхипе иртекен олимпиадăсенче, конференцисенче малти вырăнсене йышăнаççĕ. Кăçал та акă Татьяна Светопольская "11 “б” класс" 1-мĕш вырăн, Татьяна Курчина "11 “б” класс", Екатерина Ефимова "10 “а” класс" 2-мĕш вырăнсем йышăнчĕç.

Вăл ертсе пыракан 11 “б” класс пултаруллă. Елена Петровна хавхалантарса пыни ачасене çĕнĕ вăй хушать, малалла ăнтăлма хистет. Вун пĕрмĕшсем шкулти, районти, республикăри тĕрлĕ ăмăртура яланах çĕнтерÿçĕсен йышĕнче. Таня Светопольская пĕлтĕр районта иртнĕ “Çулталăкри чи лайăх вĕренекен” конкурсра пĕрремĕш вырăн çĕнсе илнĕ, кăçалхи пилĕк олимпиадăра малти вырăнсене йышăннă. Таня Курчина пĕлтĕр республика шайĕнче чăваш чĕлхипе иртнĕ олимпиадăра виççĕмĕш вырăна тухнă. Дмитрий Сидоров та пултаруллисен шутĕнче. Класра спортсмен нумай: Александр Аверьянов, Алексей Григорьев, Татьяна Кузнецова, Анастасия Николаева, Ирина Павлова, Оксана Павлова çăмăл атлетикăра çитĕнÿ хыççăн çитĕнÿ тăваççĕ. Ирина Савинова теннисла выляма кăмăллать, Петр Мясников ирĕклĕ майпа кĕрешессипе маттур. Инна Светопольская юрра-ташша ăста, Наташа Кузнецовăпа Анна Фадеевăран илемлĕ ÿкерекен çук.

Пушă вăхăта та усăллă ирттереççĕ вун пĕрмĕшсем. Елена Петровна тăтăш тĕрлĕ мероприяти хатĕрлет. Çивĕч ыйтусемпе хускатнă уçă калаçусене епле хастар хутшăнаççĕ тата! Хаваслă конкурссем класри туслăха çирĕплетеççĕ.

Елена Петровна ачасемшĕн иккĕмĕш амăшĕ. Вăл вĕсене яланах пулăшать, йывăр вăхăтра ăшă сăмах тупса кăмăла çĕклет, канаш парать. Ырă кăмăллă, лара-тăра пĕлмен тăри пек ĕçчен класс ертÿçи ачасемшĕн – чи лайăх вĕрентекен. Вăл тăрăшнипех класра пĕр-пĕрне шанни, хисеплени хуçаланать.

11 класра вĕренекен ачасен ашшĕ-амăшĕ ячĕпе

Настя СМИРНОВА (ЧР, Шупашкар районĕ, Пархикасси) ÿкерчĕкĕ.

 («Ровесник (Тантăш)», Чувашия)