Внимание!
Эта страница из архивного сайта. Информация может быть не актуальной.
Район администрацийĕн вĕрентÿ пайĕн информаципе методика центрĕ (ертÿçи — М. Ф. Фризен) ЧР Вĕрентÿ тата çамрăксен политикин министерстви “Методика служби — Чăваш Ен вĕрентĕвне” ятпа йĕркеленĕ муниципаллă методика службисен республикăри смотр-конкурсĕнче пĕрремĕш вырăна тивĕçни, унтан Новосибирск хулинче регионсем хушшинчи “Хушма професси вĕрентÿ тытăмне Раççей вĕрентĕвĕн приоритетлă енĕсене пурнăçа кĕртессипе килĕшÿллĕн çĕнетсе пырасси” ятпа пулнă конференцине хутшăнса çĕнтерни пирки хаçатра пĕлтернĕччĕ ĕнтĕ. Çавна май центр Пĕтĕм Раççейри смотр-конкурсăн юлашки тапхăрне хутшăнма та ирĕк çĕнсе илнĕ.
“Методика служби — Раççей вĕрентĕвне” Пĕтĕм Раççейри смотр- конкурсăн юлашки тапхăрĕ вара кăçалхи январьте Мускавра иртнĕ. Унăн йĕркелÿçисем — “Вĕрентÿ ĕçченĕсен квалификацине хăпартакан тата профессилле пĕлĕвне ÿстерекен академи” федераллă патшалăх вĕрентÿ учрежденийĕ тата Раççей Федерацийĕн Вĕрентÿ тата ăслăлăх министерствин Вĕрентÿри патшалăх политикин департаменчĕ. Тĕллевĕ — Раççейре квалификаци шайне хăпартмалли тытăма туса хунăранпа 80 çул çитнĕ май, методика службисен ĕçне-хĕлне çĕнетсе улăштарасси, тытăмĕпе содержанине çĕнĕ витĕм кÿресси.
Пĕлтĕрхи декабрĕн 11—22-мĕшĕсенче пулнă кĕрет мар (заочнăй) тур кăтартăвĕсем тăрăх, регионсем хушшинчи тапхăрта çĕнтернĕ муниципаллă 24 методика службинчен яллă районсенчи чи лайăх 6 финалиста суйласа илнĕ. Ку йыша пирĕн районти информаципе методика центрĕ те кĕнĕ.
Кĕрет (очнăй) тур вара кăçалхи январĕн 22—23-мĕшĕсенче Мускавра, вĕрентÿ ĕçченĕсен квалификацине хăпартакан тата профессилле пĕлĕвне ÿстерекен академире презентаци мелĕпе тата методслужбăсен йĕркелÿ модельне хÿтĕлесе иртнĕ. Унăн итогĕсемпе пирĕн центр “Педагогика опытне палăртас, тĕпчес тата пĕтĕмлетес çĕрти ĕçлĕ тытăмшăн” номинацире çĕнтерÿçĕ пулса тăнă. Ăна “Методика служби — Раççей вĕрентĕвне” Пĕтĕм Раççейри смотр-конкурс лауреачĕн Дипломне панă, “ВИТА-пресс” (DECT — ретансляторлă факсимильлĕ аппарат), “ДРОФА” (“Профильлĕ вĕрентÿ енĕпе вĕрентÿпе методика литератури”, “Мультимедильлĕ продукци “компакт-дисксем тата ăслăлăх литературин библиотечки”), “Просвещение” (ăслăлăх литературин библиотечки), “БИНОМ. Лаборатория знаний” (“Вĕрентÿри партнерлăх” ярăмри вĕрентÿ тата методика комплекчĕсем) издательствăсем парнесемпе чысланă, “Методист” журнал редакцийĕ асăннă журнала 2007 çултан çырăнса панă. Чыслав январĕн 25-мĕшĕнче “Вĕрентÿ ĕçченĕсен квалификацине хăпартакан тата профессилле пĕлĕвне ÿстерекен академи” федераллă патшалăх вĕрентÿ учрежденийĕнче юбилейлă ăслăлăхпа практика конференцийĕ вăхăтĕнче иртнĕ. Унта 150 ытла çын, çав шутра Раççей Федерацийĕн 12 регионĕнчи Пĕтĕм Раççейри смотр-конкурс çĕнтерÿçисем, хутшăннă. Пленарлă ларура çавăн пекех РФ Вĕрентÿ тата ăслăлăх министрествин Вĕрентÿри патшалăх политикин департаменчĕн ертÿçи И. И. Калина, вĕрентÿ ĕçченĕсен квалификацине хăпартакан тата профессилле пĕлĕвне ÿстерекен академи ректорĕ, педагогика ăслăлăхĕсен докторĕ Э. М. Никитин, Раççей Вĕрентÿ Академийĕн тĕп ăслăлăх сотрудникĕ М. В. Богуславский, унти А. А. Кузнецов академик-секретарь, “Учительская газета” хаçат тĕп редакторĕн пĕрремĕш çумĕ И. Г. Димова тата ыттисем пулнă. Унта “Вĕрентÿ ĕçченĕсен квалификацине хăпартас тата пĕлĕвне ÿстерес приоритетлă аталану тытăмĕ”, “Вĕрентĕве модернизацилесси, муниципаллă методика службисемпе квалификацине хăпартакан учрежденисен çакăнти пĕлтерĕшĕ”, “Педагогика кадрĕсен пĕлĕвне хăпартакан тытăма аталантармалли малашлăх”, “Хальхи условисенче хушма професси вĕрентĕвне аталантарнă çĕрти наципе регион уйрăмлăхĕсем” докладсем итленĕ. Йĕркелÿ комитечĕн председателĕ И. И. Калина, акă, хăйĕн докладĕнче пирĕн районти методслужбăн инновацилле опытне пысăка хурса хакланă, унăн “Вĕрентÿ” приоритетлă наци проектне пурнăçлас çĕрти пĕлтерĕшĕ курăмлă иккенне уйрăммăн палăртнă.
Эпир те район администрацийĕн вĕрентÿ пайĕн информаципе методика центрĕнче вăй хуракансене, унăн ертÿçине М. Ф. Фризена “Методика служби — Раççей вĕрентĕвне” Пĕтĕм Раççейри смотр-конкурс лауреачĕ пулса тăнă май ăшшăн саламлатпăр, вĕрентÿ ĕçĕнче татах та ÿсĕмсем тума ырлăх-сывлăхпа вăй-хал сунатпăр. Маттурсем Эсир!
В. ДАНИЛОВ
(«Сельская жизнь (Ял пурнăçĕ)», Красноармейское)