2007.02.09 Акцие хаваспах хутшăнтăмăр

Нарăс уйăхĕнче “Уçă алăксен кунĕ” иртрĕ. Çак кун ашшĕ-амăшĕн пĕрлехи пухăвĕ те пулчĕ. Ашшĕ-амăшĕ уçă уроксенче ачасен вĕренĕвĕпе, информаци технологийĕсемпе туллин усă курнине курса паллашрĕç.

Шкул директорĕн вĕренÿ енĕпе ĕçлекен çумĕ Р.Федорова шкулта аталанса пыракан ĕçсемпе, пĕрлехи экзаменсем еплерех иртессипе тĕплĕн паллаштарчĕ. Ашшĕ-амăшне кăсăклантаракан ыйтусем çине хуравсем пачĕ.

Çут çанталăк ыйтăвĕ те хумхантарать пире. Таса мар япаласемпе хура шыва урама тăкса варалатпăр, тавралăха илемсĕрлететпĕр. Çавна шута илсех ĕнтĕ 6-мĕш класра вĕренекенсем ашшĕ-амăшĕ умĕнче экологи ыйтăвне хускатрĕç, хальхи пурнăçпа çыхăннă “Ылтăн пулă” ятлă юмах лартса пачĕç. Пурте сăнарсене ăста калăпларĕç. Куракансем ачасен пултарулăхне пысăк хакпа хакларĕç.

 («Яльчикский край (Елчĕк ен)», Яльчики)