2007.02.05 Халăх отчет итлерĕ

Пухăннисем (педагогсем, вĕренекенсен ашшĕ-амăшĕ, ашшĕ-амăшĕсен комитечĕн, управлени тата попечительство канашĕсен представителĕсем) умĕнче гимнази директорĕ Г. И. Юлмасова çак тапхăрта учительсен коллективĕ мĕнле ĕçлесе пынипе тĕплĕн паллаштарчĕ. Патшалăхăн пĕрлĕхлĕ экзаменĕсене (ЕГЭ) ăнăçлă тытни, республикăри олимпиадăсемпе тĕрлĕ конкурссенче çĕнтерни Траксене Раççейре мала тухма, 1 миллион тенкĕлĕх грант илме май пачĕ. Çĕнтерÿçĕсен йышĕнче — И. Н. Антонова, М. К. Ашмарина, В. П. Спасова вĕрентекенсем те пур.

Отчета сÿтсе явма район пуçлăхĕн çумĕ — вĕрентÿ пайĕн пуçлăхĕ Н. И. Антонов, ЧПУн вĕренме кĕрес умĕнхи хатĕрлев факультечĕн деканĕ Н. А. Петров, Вĕренÿ институчĕн проректорĕ Ю. Б. Борисов, “Трак гимназийĕ — МВУ” управлени канашĕн председателĕ И. В. Дмитриев, канаш членĕ А. А. Муравьев, гимназири физкультура учителĕ В. В. Моисеев хастар хутшăнчĕç. Вĕсем, шкулпа общественность хушшинчи çыхăнăва тата вĕренĕвĕн пурлăх никĕсне çирĕплетес тĕллевпе тĕрлĕ сĕнÿсем пачĕç, попечительсен фондне туса хума кирлине палăртрĕç.

В. КОНСТАНТИНОВ

 («Сельская жизнь (Ял пурнăçĕ)», Красноармейское)