Внимание!
Эта страница из архивного сайта. Информация может быть не актуальной.
Январĕн 24-мĕшĕнчен пуçласа февралĕн 7-мĕшĕччен Çеçпĕл Мишши ячĕллĕ Шăхасан вăтам шкулĕнче районти учительсем валли тĕрлĕ предметпа Уçă алăксен кунĕсем иртеççĕ. Ку мероприятине педагогсем пĕр-пĕрин опычĕпе курса паллашчăр, хăйсене валли мĕн те пулин усăлли илччĕр тесе йĕркелеççĕ. Вăл е ку предмета пĕр программăпа вĕрентеççĕ пулин те, кашниех ĕçе хăйне евĕрлĕ йĕркелет-çке.
Физкультура учителĕсем валли йĕркеленĕ Уçă алăксен кунĕ январĕн 24-мĕшĕнче иртрĕ. А.Денисов тата А.Спиридонов физкультура учителĕсем 5-мĕш тата 6-мĕш “б” классенче уçă уроксем ирттерчĕç.
А. Денисов педагог 5-мĕшсемпе йăлана кĕмен урок – “Хаваслă стартсем” – ирттерчĕ. Кун пек уроксенче ачасем тĕрлĕ хусканусем тунисĕр пуçне пĕр-пĕринпе те тупăшаççĕ, ăмăртура пĕрне-пĕри пулăшма вĕренеççĕ, вăй-халне те тĕрĕслеççĕ. Мĕнлерех хаваслăх хуçаланать тата урокра. Чакаç вăтам шкулĕн вĕрентекенĕ Л.Атласкин 5-мĕш класа çитиччен ачасене пĕр учитель кăна вĕрентнине шута илсе вĕсем лайăх аталаннине палăртрĕ.
6-мĕш “б” класра гимнастика урокĕ иртрĕ. Гимнастика çыннăн вăйне, кĕлетке илемне, çаврăнăçулăхне кăтартать. Ачасем тĕрлĕрен гимнастика упражненийĕ турĕç, утрĕç, чупрĕç. Урокра кашни ача валлиех ĕç пур: пĕрисем маттă çинче хусканусем тăваççĕ, теприсем турник, тренажер çинче туртăнаççĕ, виççĕмĕшĕсем вĕрен тăрăх хăпараççĕ, скакалкăпа сикеççĕ. Арçын ачасенчен нумайăшĕ футболла выляма юратнине палăртать А.Спиридонов вĕрентекен. Президентăн “Çĕнĕ шкул” программине пурнăçлассипе Шăхасан шкулĕ тухăçлă ĕçленине асăнса хăвармалла.
10-11-мĕш классен физкультура урокĕсем физкультурăпа спорт комплексĕнче иртеççĕ. Кунта пысăк зал, ăшă, çутă. Сывлăха çирĕплетме, ăсталăха ÿстерме условисем лайăх.
Уроксем вĕçленсен Ямаш тата Пайкилт вăтам шкулĕсенче вĕренекенсем волейбол енĕпе юлташла тĕл пулу ирттерчĕç. Çитес вăхăтра кун евĕрлĕ тĕл пулу Сиккасси тата Татмăш вăтам шкулĕсенче вĕренекенсем хушшинче иртĕ. Кăмăл тăвакансене спорт комплексĕнче хапăл туса йышăнаççĕ.
И. ИЛЬИНА
(«Канашский край (Канаш ен)», Канаш)