2007.01.31 «Пирĕн Хусанкайăмăр, поэзири ăмăрт кайăкăмăр»

Тăван çĕршыв тата тĕнче культурине аталантарас енĕпе сумлă ĕçсем тунине шута илсе, Чăваш Республикин Президенчĕ Н.В.Федоров ятарлă Хушу та кăларнă. Чăваш Енре 2007 çул – Хусанкай çулĕ. Çулталăкĕпех юбилей мероприятийĕсем иртĕç.

Пуянкассинчи пĕтĕмĕшле пĕлÿ паракан тĕп шкулта Хусанкай юбилейне халалланă уяв чаплă иртрĕ. Савăнăçлă линейкăра чăваш чĕлхипе литературине вĕрентекен В.П.Красновпа Л.П.Краснова учительсем поэт пурнăçĕпе ĕçĕ-хĕлĕ çинчен каласа пачĕç, ачасем Хусанкай сăввисене пăхмасăр вуларĕç.

Уяв программипе килĕшÿллĕн, 5-9 классенче илемлĕ сăвă вулакансен конкурсĕ иртрĕ. Марина Петрова, Светлана Данилова, Маргарита Большакова, Александр Юманов «Тăван çĕршыв», «Аннене» сăвăсене тата «Таня» поэмăри сыпăксене артист пек илемлĕ вуларĕç. 5 класра вĕренекен Степан Большаков вуланă «Çĕршы-вăмçăм, Чăваш çĕршывĕ» сăвва та ытараймасăр итлерĕç уява пуçтарăннисем. 5 класри Катя Пушкинапа Настя Калашникова Хусанкай Атнер ывăлне халалланă «Сăпка юррине» илемлĕн шăрантарчĕç. 8 класри Александр Пушкин «Эп – чăваш ачи», Лида Угарина «Сăмах хавалĕ» сăвăсене лайăх вуланине те палăртмалла. Миша Спиридонов Хусанкай сăввине вырăсла вуларĕ. Аля Кувшинова «Тăван çĕршыв» сăвва чун-чĕрене хумхантармалла каласа пачĕ. 9 класра вĕренекенсем «Натали кĕпе тĕрлет» сыпăка вуласа савăнтарчĕç.

6-7 классенче вĕренекенсем Хусанкай произведенийĕсем тăрăх ÿкерчĕксем тунă. 5-7 тата 8-9 классенче литература вăййисем иртрĕç.

Поэт юбилейне халалласа шкулта стена хаçачĕсем кăларнă. Çавăн пекех 7-9 классенче рефератсен конкурсĕ, 8-9 классенче сочиненисен конкурсĕ пулчĕ. Комьютерпа усă курса 7-9 классенче вĕренекенсем Хусанкайăн «Таня» поэмине тишкерчĕç. 5-6 классенче поэт юбилейне халалласа ирттернĕ уçă урока ачасен ашшĕ-амăшĕсем те хутшăнчĕç.

«Хусанкай – 100 çулта» уяв малалла пырать. Вĕренекенсем поэт пултарулăхĕ çинчен сочиненисем çыраççĕ, сăввисене пăхмасăр вĕренеççĕ.