Внимание!
Эта страница из архивного сайта. Информация может быть не актуальной.
Патăрьелĕнчи професси училищинче районти ял тăрăх пуçлăхĕсен вĕрентÿ-канашлăвĕ иртнĕ. Унăн ĕçне район пуçлăхĕ Н.Глухов, АПК предприятийĕсен хутшăнăвĕн ыйтăвĕсемпе ĕçлекен пай пуçлăхĕ М.Калмыков, строительствăпа обществăлла инфратытăм аталанăвĕн пай пуçлăхĕ И.Дикин, районти выльăх-чĕрлĕх чирĕсемпе ĕçлекен пай пуçлăхĕ П.Ефимов, “Агро-Инновация” унитарлă предприяти представителĕ А.Терентьев хутшăннă.
Вĕрентÿ-канашлура чăн малтанах район пуçлăхĕ Н.Глухов районта приоритетлă наци проекчĕсене, ял халăхĕн пурнăçне улăштармалли республика тата федераллă программăсене мĕнле пурнăçа кĕртни, района аталантармалли малашлăх программăсем çинче чарăнса тăнă.
Наци проекчĕсенчен ял çыннишĕн, çĕр ĕçченĕшĕн пĕлтерĕшлисенчен пĕри “АПКна аталантарасси” çинчен кăларнăскер. 2007 çулта ăна районта мĕнле пурнăçа кĕртес пирки калаçу пуçарнă М.Калмыков. Вĕренÿре вăл вырăнсенче ял хуçалăх кооперативĕсем тумалли условисемпе паллаштарнă.
– Районта наци проектне пурнăçа кĕртме тытăннăранпа, ял хуçалăх потребитель кооперативĕсем туса хунă: “Светлана” (В.Кузнецов), “Потенциал” (М.Калмыков) тата “Азира” (А.Абдулвалеев). Вĕсем пурте республикăри ял хуçалăх министерствинче аккредитаци тухнă. Ку тĕлĕшпе кăçал ĕç-пуç тата лайăхланмалла, – паллаштарнă Мансур Миневелиевич çакнашкал кооперативсем уçнин эффективлăхне çивĕчлетсе.
Ял тăрăх пуçлăхĕсен канашлăвĕнче вырăнсенче РФ Хула строительствин кодексне епле пурнăçлани çинчен те ыйту пăхса тухнă. Кун пирки строительствăпа обществăлла инфратытăм пайĕн пуçлăхĕ И.Дикин паллаштарнă.
Кунтах 2006 çулта районта уй-хир тата выльăх-чĕрлĕх продукчĕсем туса илнине пĕтĕмлетнĕ, 2007 çулта ял тăрăхĕсенче килти хушма хуçалăхсене, фермер хуçалăхĕсене малалла аталантармалли çул-йĕре пăхса тухнă, çак тĕллевпе вырăнсенче патшалăх паракан укçа çăмăллăхĕсемпе – кредитпа хастартарах усă курмаллине каланă.
А.НИКОЛАЕВА
(«Авангард», Батырево)