2007.01.19 ЫРĂ ĔÇ ТĂВАКАН – ЫРĂ КУРАКАН

Хаваслă та интереслĕ ирттереççĕ вăхăта Шăхаль шкул ачисем. Вăрнар район центрĕнчен чи аякра вырнаçнă ку пĕлÿ çурчĕ. Юнашарах – Тутарстан республики пуçланать. Апла пулин те шкулта кашни ачах хăйне килĕшекен ĕçпе аппаланма, тĕрлĕ кружока çÿреме пултарать. Чылай хĕр ача тĕрĕ тĕрлеме вĕренесшĕн, арçын ачасем йывăçран эрешсем касса кăларма, темĕн те пĕр ăсталама хăнăхаççĕ. Аслăраххисем вара “Çамрăк таврапĕлÿçĕ” кружока ытларах килĕштереççĕ. Вĕсем ку шкултан вĕренсе тухса тĕрлĕ ĕçре палăрнă ентешĕсем пирки нумай материал пухнă. Ятарласа стендсем хатĕрленĕ. Вĕсем шкул кун-çулне те çутатаççĕ.

Галина Алексеевна Трофимова вĕрентекен ертсе пынипе малашне тата тăрăшарах ĕçлесшĕн. Тĕллевĕсем пысăк та çунатлă: вĕсем тăван ял историне туллин тĕпчесшĕн, ятарлă кĕнеке кăларасшăн. Материалĕсене пухма пуçланă та ĕнтĕ. Ырă ĕçе кÿлĕннĕ ача.