Внимание!
Эта страница из архивного сайта. Информация может быть не актуальной.
Хĕллехи каникулта юлташĕсем пĕр шухăшсăр каннă вăхăтра Сергей Емельянов кĕнеке хыççăн кĕнеке шĕкĕлчерĕ, физика законĕсене аса илчĕ. Хăйĕн вĕрентекенĕ Л.Р.Езюков сĕннĕ ĕçсене тишкерчĕ. Республикăри олимпиадăра район чысне хÿтĕлесси шÿт-им( Унта пĕрремĕш хут хутшăнакан Сергей те самай хумханчĕ.
Çĕрпÿ районĕнчи 1-мĕш шкул ачисене çулленех курма пулать ăслăлăх ăмăртăвĕнче. Шанăç паракан, тăрăшуллă çамрăксемпе 7-мĕш класранпах ĕçлеме пуçлать Леонид Романович. Шкул программине çеç пĕлнипе районта çĕнтерме пулĕ-ха, республикăра вара...
Вăрнар районĕнчи Калинино шкулне çÿрекен Виталий Ананьев та кунти ăмăртăва мĕнлерех ăслă яшсемпе хĕрсем пухăннине аван пĕлет. Çавăнпа кашнинчех хăй тĕллĕн те нумай хатĕрленет. Кирлĕ кĕнекесем туянать, вăхăт тупăнсанах вулать, вулать, шутлать... Исаак Ньютон, Игорь Курчатов тата ытти физик та хăй вăхăтĕнче çапла тăрăшнă ĕнтĕ. Унсăрăн нимĕн те пулмасть.
...Олимпиада кăтартăвĕсене пурте чăтăмсăррăн кĕтеççĕ. Виталие вĕрентекен Андрей Геннадьевич Иванов ытларах та хумханнăн туйăнать. 11-мĕшсем хушшинчи çĕнтерÿçĕсен йышĕнче Ананьев хушамат курăнмарĕ. Тĕп хулари лицейсенче, ăс пухакансем ыттисене хăйсенчен ирттерсе ярасшăнах мар çав. Анчах уншăн кулянма-и Чи пахи – хутшăнни.
Çĕнтерÿçĕсем каллех Шупашкар хулинче ăс пухакансем – 3-мĕш лицейри Юрий Тарелкинпа "9-мĕшсем хушшинче" Александр Сидуков "10-мĕшсем хушшинче" тата Андрей Андреев "44-мĕш лицей, 11-мĕш класс".
Çакна та палăртмалла: иртнĕ çул республикăри олимпиадăсем 21 предметпа иртнĕ пулсан, кăçал вĕсен шучĕ ÿснĕ, çирĕм пиллĕке çитнĕ. Çĕннисем – астрономи, француз чĕлхи, политехника тата предприниматель ĕçĕпе потребитель пĕлĕвĕсен никĕсĕ.
Алина ПУЗЫРНИКОВА