2007.01.11 Асра юлмалли чăнахах нумай

Асра юлмалли сахал мар хĕрлĕ йытă çулталăкĕнче. Тăван шкула вĕр çĕнĕ автобус парнелерĕç. Пурте чĕререн хĕпĕртерĕмĕр. Унпа кашни класах Шупашкарта экскурсире пулса курчĕ. Вĕренекенсем капăр хуламăрăн урамĕсемпе, илемлĕ те пуян паркĕсемпе киленчĕç, тĕрлĕ музейсенче пулса курчĕç.

Чăваш наци музейне кайнă экскурси асран тухмасть. Тинĕсри чĕр чунсен пурнăçне сăнлани, экзотика чĕр чунĕсемпе паллашни яланлăхах асра юлчĕ. Акă, 5-мĕш классем А. Николаев летчик-космонавт паркĕнче савăнчĕç, çиччĕмĕшсем вара “Мир Люксор” кинотеатрта “Рога и копыта” илемлĕ фильм пăхрĕç. Пушара хирĕç кĕрешмелли музейра пулса курни те усăллă пулчĕ. Аслă классенче вĕренекенсем ЧПУн медицина факультечĕн музейне кĕрсе курчĕç. Экскурсисем нумай ырă шухăш çуратрĕç, тавракурăма анлăлатрĕç. Пире çул çÿреве тÿлевсĕр илсе çÿрерĕç, çул хакне кĕркунне çĕр улми пухнă çĕрте ĕçлесе илнĕ укçапа саплаштарчĕç.