2007.01.10 Çĕнтерÿçĕсем — елкăра

Çĕнĕ çул уявĕ Шупашкарти трактор тăвакансен культура керменĕнче иртнĕ, ачасем çак питех те илемлĕ мероприятире савăннă, депутат аллинчен пылак кучченеçсем илнĕ. Творчествăлла чи лайăх ĕçсене Культура керменĕн выставкине тăратнă. Конкурса Чăваш Республикинчи хуласемпе районсенчи, яллă вырăнсенчи шкулсенче вĕренекенсем 4, 5 пин ытла ĕç тăратнă. Пирĕн районти 25 вĕренекен конкурс çĕнтерÿçисем пулса тăнă, çав елкăна хутшăннă. Конкурса хутшăннă кашни ачах депутат йĕркеленĕ елкăна хутшăнайман пулин те, вĕсем хушшинче выляса янисем çук. Кашниех творчествăлла ĕç хатĕрлесе хăйĕн çемйин, йăх-несĕлĕн историне пĕлме пултарнă-çке. Акă, сăмахран, Юля Гаврилова çапла çырнă: “Çак конкурса творчествăлла ĕç тăратас тесе, эпĕ асаннерен, асаттерен, аттепе аннерен йăх-несĕл пирки нумай ыйтса пĕлтĕм, сарăхнă сăн ÿкерчĕксене тата тĕрлĕрен документсене тишкертĕм”. Асăннă конкурса пула ачасен хăйсен йăх-несĕл тымарĕпе, çемье йăли-йĕркипе интересленес туртăм çурал-нă. Вĕсем ĕлĕкхи ватăсен йăх-несĕл тымарĕсемпе интересленсе тата пĕлсе, ашшĕ-амăшĕсемпе татах та çывăхланчĕç. Конкурс хайлавĕпе пĕтĕм çемье ĕçленĕ-çке.