2010.08.21 14 ҫемье парнене тивӗҫрӗ (Чăваш хĕрарăмĕ)

ЧР Президенчӗн Николай Федоровӑн пуҫарӑвӗпе республикӑра пӗр ҫӗрте вӑй хуракан ҫемье династийӗсене сумлӑ лару-тӑрура чысласси йӑлана кӗчӗ. Чӑваш Енре Мускав культура кунӗсем иртнӗ май Вӗрентекен ҫулталӑкӗнче учительсен династийӗсене тата Тӑван ҫӗршывӑн Аслӑ вӑрҫине хутшӑннӑ, Мускава хӳтӗленӗ ветерансене чысларӗҫ.

- Мускав культурин кунӗсем иртнӗ май республикӑра тӗрлӗ ӗҫ-пуҫ пулса иртет. Ҫапах та ҫак мероприятирен пуҫлани пӗлтерӗшлӗ. Эпир мирлӗ пурнӑҫ парнеленӗ ветерансемпе пире ура ҫине тӑма пулӑшнӑ вӗрентекенсене сумлатпӑр, - терӗ ЧР вӗренту министрӗ Галина Чернова.

Мускав Правительствин Регионти ҫыхӑнусемпе наци политикин комитечӗн ертӳҫи Михаил Соломенцев вӑрҫӑ ветеранӗсемпе вӗрентекенсен 14 династийӗн представителӗсене парне туянмалли сертификат парса саламларӗ.

Чӑваш Енре педагогсен династийӗ 200 ытла, чылай-ӑшӗн пӗтӗмӗшле ӗҫ стажӗ -200-тен пуҫласа 700 ҫул таранах. Чи малтанах Вӑрмар районӗнчи Зайцевсен династине палӑртмалла. Вӗсен пӗтӗмӗшле ӗҫ стажӗ - 717 ҫул. Династие пуҫаракан Григорий Зайцев асӑннӑ районти Мӑнҫырмари, Ҫӗнӗ Ишпуҫри, Кавалти шкулсене йӗркеленӗ. Зайцевсен йӑхӗнче 3 профессор, ӑслӑлӑх 3 кандидачӗ, 1 академик та пур. Григорий Николаевич вӗрентӳ тытӑмӗнче 45 ҫул тӑрӑшнӑ. Паян ырӑ ҫак ӗҫе малалла тӑсаканӗсем - Светлана Тимофеева /Зайцева/ тата Наталия Зайцева. Ҫӗрпури Шумиловсен ҫемйинчен, акӑ, 28 педагог тухнӑ. Вӗсен педагогикӑри ӗҫ стажӗ - 613 ҫул. Ҫакнашкал пултаруллӑ династисем -республика чысӗ, хисепӗ. Пархатарлӑ ӗҫе малалла тӑса-кансем пурри пушшех савӑнтарать.

Татьяна НИКОЛАЕВА.