2009.10.15 Библиотека, театр тата туслăх (Тантăш)

Библиотекарь специальноçĕ айккинчен пăхма кăна çăмăл. Тĕрĕссипе куçа курăнман мĕн чухлĕ ĕç унăн! Ахальтен мар ĕнтĕ республикăри вулавăшсенче тăрăшакан 200 çамрăкран 59-шĕ Президент стипендине тивĕçнĕ. Вĕсен хушшинче ял ĕçченĕ-сем те пурри савăнтарать.

Мускавран килнĕ хăна, Раççей патшалăх библиотекинче тăрăшакан И. П. Маркова, хăй тĕлĕннине пытармарĕ: “Сирĕн кунта мĕн чухлĕ çамрăк! Пурин те куçĕсем хавхаланупа çиçеççĕ. Çавăнпах пуль сирĕн библиотекăсем паянхи саманапа тан пыраççĕ. Техникăпа пĕрлех чун пуянлăхĕ те иксĕлменни сисĕнет.”

Çĕмĕрлерен, Сĕнтĕрвăрринчен, Канашран, республикăри тĕрлĕ районтан килнĕ чи пултаруллă библиотекарьсем хăйсен ĕçĕ-хĕлĕнче тĕл пулакан путишле самантсемпе те паллаштарчĕç. Юрăпа та, ташăпа та, пĕчĕк фильм евĕрлĕ электронлă версипе те тыткăнларĕç вĕсем куракана.

Чи пĕлтерĕшли – çак форума ачасем те хутшăнни. Уйрăмах Çĕмĕрлери “Слово” театр ушкăнĕн маттурлăхĕ тĕлĕнтерчĕ. Зинаида Шурыгина ертсе пыракан шăпăрлансем Ева Лисинан “Çĕньял ачисем” повесть сыпăкне кăтартрĕç. Ачасем чăннипех те артистланма пултарни кăна мар, чăваш халăх юрри-ташшине, вăййи-куллине чун витĕр кăларма ăсталăх çитерни кăмăла çĕклерĕ.

Автора хăйне те çамрăксем литература хайлавне çавăн пек лайăх ăнланни питĕ килĕшрĕ. Малашне пĕрле çыхăнса ĕçлеме сăмах татрĕç вĕсем: паллă çыравçă Ева Лисина тата ушкăн ертÿçи Зинаида Шурыгина. Çапла майпа библиотека форумĕнче çуралнă туслăх, тен, куракана çĕнĕ спектакльпе те савăнтарĕ.

Римма Прокопьева